کۆمەڵەی پیشەسازی نەوتی کوردستان APIKUR داوا لە ئەنجومەنی نوێنەران و پیرانی ئەمەریکا دەکات دەستبەجێ هاوکارییان بکەن

لە نامەیەکدا لە بەرواری ٢٩ی کانوونی دووەمی ٢٠٢٤ کۆمەڵەی پیشەسازی نەوتی کوردستان” ئاپیکور” بۆ ئەنجومەنی نوێنەران و ئەنجومەنی پیرانی ئەمەریکای ناردووە داوای هاوکاری دەستبەجێ دەکات.

نامەکە ئاراستەی ئەم لایەنانە کراوە:

1. لیژنەی کاروباری دەرەوەی ئەنجومەنی نوێنەرانی ئەمریکا.
2. لیژنەی خزمەتگوزارییە چەکدارەکانی ئەنجومەنی پیرانی ئەمەریکا .
3. لیژنەی پەیوەندییەکانی دەرەوەی ئەنجومەنی پیرانی ئەمریکا.
4. لیژنەی ئەنجومەنی نوێنەران بۆ خزمەتگوزارییە چەکدارەکان.

لە نامەکەدا داوای هاوکاری دەستبەجێ دەکات و دەڵێت “ئەندامێتی کۆمەڵەکەمان هەشت کۆمپانیای نێودەوڵەتی نەوت و گاز لەخۆدەگرێت کە لە هەرێمی کوردستان کاردەکەن، لەنێویاندا سێ کۆمپانیای خاوەندارێتی ئەمریکی و چەند کۆمپانیایەکی دیکە کە پشک و بۆندێکی بەرچاویان هەیە. داوای هاوکاری دەستبەجێتان لێدەکەین بۆ ڕازیکردنی حکومەتی فیدراڵی عێراق بۆ چارەسەرکردنی بەپەلە ئەو کێشانەی کە بووەتە هۆی ڕاگرتنی زیاتر لە 400 هەزار بەرمیل لە ڕۆژێکدا هەناردەکردنی نەوتی خاو لە KRI بۆ بازاڕە جیهانییەکان.

خاڵە سەرەکییەکانی نامەکە:

• ئەپیکور داوای یارمەتی دەستبەجێ  لە کۆنگرێسی ئەمریکا دەکات و داوادەکات هەنگاو بنێت بۆ  ڕازیکردنی حکومەتی فیدراڵی عێراق بۆ دەستپێکردنەوەی هەناردەکردنی نەوت لە هەرێمی کوردستانی عێراق، ئەمەش پێش سەردانەکەی سەرۆکوەزیرانی عێراق بۆ کۆشکی سپی.

• وەستانی هەناردەکردنی نەوتی خاو، کە زیاتر لە 10 مانگ بەردەوامە، لەگەڵ چارەسەرنەکردنی کێشەکانی بودجەی فیدراڵی عێراق، هەروەها پابەندنەبوونبە مەرجە گرێبەستییە و پارەدانی ڕابردوو و داهاتوو بە کۆمپانیا نەوتییە نێودەوڵەتییەکان، هەڕەشە لە سەقامگیری دارایی هەرێمی کوردستان دەکات – هەرێمێک کە هاوپەیمانێکی ئەمنی جێگیر بووە  بۆ ئەمریکا لە ڕۆژهەڵاتی ناوەڕاست.

•  ئەپیکۆر جەخت لەسەر وەبەرهێنانە بەرچاوەکانی ئەمریکا و نێودەوڵەتی لە ناوچەکەدا دەکاتەوە کە کۆی گشتی زیاتر لە ١٠ ملیار دۆلارە و پێویستی پاراستنی ئەو بەرژەوەندییانە.

  کۆمەڵەی پیشەسازی نەوتی کوردستان (ئاپیکور) داوی لە کۆنگرێسی ئەمریکا کرد کە بەپەلە هەنگاو بنێن بۆ یارمەتیدان لە چارەسەرکردنی کێشەی وەستانی هەناردەکردنی نەوتی خاو لە هەرێمی کوردستانەوە. ڕاگرتنی هەناردەکردن کە کاریگەری لەسەر زیاتر لە 400 هەزار بەرمیل نەوت لە ڕۆژێکدا هەبووە، زیاتر لە 10 مانگە بەردەوامە و بە توندی کاریگەری لەسەر ئابووری و سەقامگیری هەرێم هەیە لە کاتێکدا کە  گرژییەکانی ناوچەکە لە هەڵکشاندایە.

لە نامەیەکدا بۆ کۆنگرێس، ئەپیکور بە وردی باسی وەبەرهێنانە بەرچاوەکانی ئەمریکا و نێودەوڵەتی لە هەرێمی کوردستانی عێراق کرد کە کۆی گشتی زیاتر لە 10 ملیار دۆلارە، کە ئێستا لە مەترسیدان. لە نامەکەدا جەخت لەسەر پێویستی بەپەلەی هاندانی کۆنگرێسی ئەمریکا بۆ هاندانی سەرۆکوەزیرانی عێراق کردەوە بۆ چارەسەرکردنی چەقبەستووی بەرهەمهێنان و هەناردەکردنی نەوت پێش سەردانی داهاتووی بۆ ئەمریکا.

هەروەها دەڵێت: کۆشکی سپی بانگهێشتی سەرۆکوەزیرانی عێراقی فیدراڵی کردووە تا سەردانی بکا،  داواکارین کە ئەم دەرفەتە بقۆزنەوە بۆ ئەوەی  سەرۆکوەزیرانی عێراق قایل بکەن  کە حکومەتی فیدراڵ دەبێت ڕێگە بە کۆمپانیا نەوتییەکانی ئەمریکا، و هەموو ئەندامانی ئەپیکور بدات، کە بە ئازادی نەوتەکەیان بەرهەمبهێنن و هەناردەی بازاڕە جیهانییەکان بکەن. پێویستە حکومەتی عێراقی فیدراڵ دەستبەجێ دوو پرس چارەسەر بکات: جێبەجێکردنی تەواوی بودجەی عێراق بۆ هەرێمی کوردستان کە زۆر پێویستە بۆ کۆمپانیاکانی ڕۆژئاوا و ئەمریکی بۆ دەستپێکردنەوەی کارەکانیان، هەروەها گەرەنتی پارەدان بۆ هەناردەکردنی نەوتی ڕابردوو و داهاتوو بەپێی مافە گرێبەستییەکانیان.

لە نامەکەدا هاتووە “ئاماژە بە پەیوەندییەکانی پێشوومان دەکەین ، لە بەرواری ٩ی شوبات و ٢٤ی نیسانی ٢٠٢٣، سەبارەت بە دۆخی ناجێگیری هەرێمی کوردستانی عێراق KRI. بەداخەوە لە دوایین نامەی ئێمەوە بارودۆخەکە خراپتر بووە. وەستاندنی هەناردەکردنی نەوتی خاو لە هەرێمەوە، کە ئێستا زیاتر لە ١٠ مانگ دەخایەنێت، لەگەڵ کێشە چارەسەرنەکراوەکانی بودجەی فیدراڵی لەلایەن حکومەتی عێراقەوە، بەردەوامە لە هەڕەشەکردن لەسەر سەقامگیری دارایی و پێگەی سەربەخۆییهەرێم  KRI- هەرێمێک کە هاوپەیمانێکی ئەمنی جێگیر بووە بۆ ئەمریکا لە ڕۆژهەڵاتی ناوەڕاست. ئەمریکا وەبەرهێنانی بەرچاوی کەرتی گشتی و تایبەتی لە کوردستان KRI کردووە.

هەروەها دەڵێت: ئەپیکۆر پابەندە بە رانبەر هەرێمی کوردستان و داوا لە کۆنگرێسی ئەمریکا دەکات پاڵپشتی هەوڵەکان بکات بۆ دەستپێکردنەوەی بەرهەمهێنان و هەناردەکردنی نەوت بە تەواوی، کە ئەمەش بۆ سەقامگیری ئابووری و ئاسایشی ناوچەکە زۆر پێویستە.

مایڵز کاگینز، وتەبێژی کۆمپانیای ئەپیکور وتی: سەرۆکوەزیرانی عێراق دەبێت نیشانی بدات کە پابەندە بە سەرکردایەتیکردنی حکومەتەکەی بۆ گەیاندنی چارەسەرێکی سودبەخش بۆ هەردوولا کە چیتر لەڕووی ئابوورییەوە هەرێمی کوردستان KRI نە خنکێنێت. ئاماژەی بەوەشکرد: ئەم چارەسەرە بریتییە لە دەستپێکردنەوەی هەناردەکردنی نەوت لە هەرێمی کوردستانەوە بۆ بازاڕە نێودەوڵەتییەکان بە پارەدان و دڵنیایی گرێبەست بۆ کۆمپانیاکانی ڕۆژئاوا و ئەمریکی بۆ دەستپێکردنەوەی کارەکانیان، هەناردەکردنی نەوت هەوێنی ئابووری عێراقە، و هەموو عێراقییەکان سوودمەند دەبن کاتێک بەرهەمی تەواو و فرۆشتنی جیهانی لە هەرێمی کوردستانەوە دەست پێدەکاتەوە”.

لە کۆتایی نامەکەدا ئاپیکور ئاماژە بە دانیشتنەکانیان لە گەڵ حکومەتی بەغدا و   هێرشە موشەکییەکانی ئەم دواییە دەکات بۆ سەر هەرێم و دەڵێت:  کۆبوونەوەکان لە بەغدا لە ٧-٩ی کانوونی دووەمی ٢٠٢٤ لە نێوان نوێنەرانی حکومەتی هەرێمی کوردستان، حکومەتی عێراق و کۆمپانیا نێودەوڵەتییەکانی نەوت بەڕێوەچوون — لەنێویاندا نوێنەرانی چەندین کۆمپانیای ئەندامی ئەپیکور. بەڵام، تا ئێستا، هیچ پێشکەوتنێکی کۆنکرێتی بەرەو ئەو ئامانجە نەبووە کە پێشکەش بە ئەندامانی ئەپیکور کراوە.

سەرەڕای هێرشە مووشەکییە بالیستیکییەکانی ئەم دواییە و زیادبوونی هەڕەشەکانی گرووپە میلیشیاکانی سەر بە ئێران لە سەرتاسەری عێراق، پابەندین بە کوردستانەوە. زۆر گرنگە کە دەست بە بەرهەمهێنانی تەواوەتی نەوت بکەینەوە بۆ ئەوەی سەقامگیری ئابووری لە ناوچەکەدا وەک قەڵایەک لە بەرامبەر کاریگەرییە تێکدەر و ناسەقامگیرکەرەکانی ئەکتەرە دەرەکییەکان دروست بکەین.

 تەواوی نامەکەی APIKUR بۆ کۆنگرێسی ئەمریکا بەردەستە بۆ داگرتن لەم لینکە:

دەقی نامەکەی APIKUR بۆ کۆنگرێسی ئەمریکا