جارێکی تر بەرهەمی کێڵگەی ئەتروش زیادی کرد

ڕوونبین

بەپێێ زانیارییەکانی ڕوونبین لە چارەکی دووەمی ٢٠٢١ ەوە بیری بەرهەم هێنی CK-17 تەواو بووە، تێکڕای بەرهەمی بیرەکە نزیکەی ٢,٠٠٠ بەرمیل نەوتی رۆژانەیە و بەمەش ئێستا کۆی بیرە بەرهەم هێنەکانی کێڵگەی ئەتروش گەشتووەتە ١١ بیری بەرهەم هێن و بەرهەمی کێڵگەکەش ئێستا زیاترە لە ٤٤ هەزار بەرمیل نەوتی ڕۆژانە. کۆمپانیای شاماران دەڵێت ئەم بیرە بە کەمتر لەو بوجەی بۆی تەرخانکرابوو تەواو بووە.

کێڵگەی ئەتروش کێڵگەیەکی نوێ یە ، لە تەموزی ساڵی ٢٠١٧ ەوە دەستکراوە بە بەرهەم هێنانی نەوت و لەسەرەتای بەرهەمەوە تاسەرەتای مانگی شەش(حوزەیران)ی ٢٠٢١ کۆی بەرهەم گەشتووەتە ٤٥ ملیۆن بەرمیل نەوت و ئێستا لە ٩ی تەموزدا زیاترە لە ٤٦ ملیۆن بەرمیل نەوت بەرهەم هاتووە تێیدا.

بەپێی کۆمپانیاکانی بەرهەم هێنی نەوت لە هەرێم: بەرهەم هێنانی نەوت لە هەرێمی کوردستان یەکێکە لەو شوێنانەی جیهان کە کەمترین تێچوی هەیە لە ڕووی دۆزینەوە، پەرەپێدان و خەرجی وەگەرخستنەوە. بەڵام بەپێچەوانەی کۆمپانیاکانی نەوتەوە وەزیری سامانە سروشتییەکانی هەرێم دکتۆر کمال ئەتروشی لەهۆڵی پەرلەمان لە بەرواری ٢٠٢١/٦/٢٨ دا وتی: مەترسی بەرهەمهێنانمان بەراورد بەعێراق زیاترە هەروەها تێچوی نەوتەکەمان ٢٠ بۆ ٣٠ جار لە وڵاتانی ناوچەکە زیاترە .

کێڵگەی نەوتی ئەتروش دەکەوێتە پارێزگای دهۆک و ٨٥ کیلۆمەتر لە باکوری ڕۆژئاوای هەولێرەوەیە. سێهەم گەورەترین کێڵگەی بەرهەمهێنی نەوتە لە دوای خورمەڵە و تاوکی. بەپێی ئەو بەڵگانەی لەبەر دەستی ڕوونبینە بەرهەمی ئەم کێڵگەیە لە چارەکی یەکەمی ٢٠٢٠دا ٤٦هەزار و ٧٠٠ بەرمیلی ڕۆژانە بووە بەڵام لە چارەکی یەکەمی ٢٠٢١ دا دابەزیوە بۆ ٣٨ هەزار و ٢٠٠ بەرمیل، هۆکارەکەی بۆ کەمکردنەوە و سنوردار کردنی پرۆسەکانی پەرەپێدان بووە لە ساڵی ڕابوردودا بەهۆی نزمی نرخی نەوتەوە بە ڵام لەسەرەتای ئەم ساڵەوە پەرەپێدان جارێکی تر لە بیرەکاندا دەستی پێکردووەتەوە و زیاد کردنی بەرهەم جارێکی تر بۆ سەرو ٤٤ هەزار بەرمیل بەرهەمی ئەوەیە.

نەوتی ئەتروش ئێستا لە ساڵی چوارەمی بەرهەمی دایە و هەموو نەوتە بەرهەم هێنراوەکە دەفرۆشرێت بە هەرێمی کوردستان بە نرخی بازاڕی نێودەوڵەتی نەوت، دوای داشکاندنی جۆری (کوالێتی) نەوت و تێچوی گواستنەوە. کۆمپانیای شاماران ٢٧٫٦٪ ی پشکی کێڵگەکەی هەیە و پشکی کۆمپانیای تاقە ی ئیمارەتی ٤٧٫٤٪ ە و هەرێمیش ٢٠٪.