بەپێی هەواڵێکی پێگەی وەزارەتی نەوتی عێراق و بەپێی ئاماری سەرەتایی کۆمپانیای بەبازاڕکردنی نەوتی عێراق( سۆمۆ) کۆی هەناردەی نەوتی عێراق لەمانگی نیساندا بریتی بووە لە ١٠٣ ملیۆن و ١٤٤ هەزار و ٩١١بەرمیل. کۆی داهاتی ئەومانگە بریتی بووە لە ١ ملیار و ٤٢٣ ملیۆن و ٤٩٩هەزار دۆلار .
بەرهەمی کێڵگەکانی ناوەڕاست و باشور ١٠٠ ملیۆن و ٥٣٢ هەزار و ٤٢٧ بەرمیل پێک هێناوە. ئەونەوتەشی لە کێڵگەکانی کەرکوکەوە لەڕێی بەندەری جیهانەوە هەناردەکراوە بریتی بووە لە ٢ ملیۆن و ٢٨٧ هەزار و ١٦٥ بەرمیل نەوت، هەروەها نەوتی هەناردەکراو بۆ ئوردون بریتی بووە لە ٣٢٥ هەزار و ٣١٩ بەرمیل.
تێکڕای هەناردەی ڕۆژانە لەڕێی بەسرەوە بریتی بووە لە ٣ ملیۆن و ٤٣٨ هەزار بەرمیل وە لەڕێی بەندەری جیهانەوە ڕۆژانە ٧٦ هەزار بەرمیل و ئۆردونیش ١١ هەزار بەرمیل بووە.
هەروەها لە هەواڵەکەی وەزارەتی نەوتدا هاتووە کە نرخی بەرمیلێک نەوت لەمانگی نیساندا بەتێکڕا بە ١٣,٨٠١$ فرۆشراوە.
داهاتی عێراق لە مانگی ئازاری ڕابوردودا بریتی بووە لە ٢ملیار و ٩٨٨ ملیۆن دۆلار و نرخی بەرمیلێک نەوتی عێراق بە ٢٨٫٤٣$ فرۆشراوە. لە مانگی شوباتیشدا ٥ ملیار و ٥٢ ملیۆن بووە و نرخی نەوتی ئەومانگەش بریتی بووە لە ٥١٫٣٧$ . واتە بەبەراورد بە مانگی ئازار داهاتی عێراق ٥٢٫٥٪ کەمی کردووە وە بەراورد بە مانگی شوبات و پێش دابەزینی بەرچاوی نرخی نەوت ٧٢٪ کەمی کردووە.
بەهۆی بڵاوبونەوەی ڤایرۆسی کۆڤید ١٩ وەو ئەوڕێ و شوێنانەی لە جیهاندا بۆ ڕێگری کردن لە بڵاوبونەوەی گیراوەتەبەر، ئابوری جیهان لەقەیرانێکی قوڵدایەو خواست و نرخی نەوت بۆ نزمترین ئاست دابەزیوە و ئەو وڵاتانەی بەشێوەیەکی سەرەکی پشت بەداهاتی نەوت دەبەستن گەورەترین قوربانی دابەزینی نرخی نەوتن.
